تجربة الطلب من موقع كيم كرداشيان سكيمز | SKIMS 🖤

السلام عليكم .. صباح الخير جميعاً ، كيف حالكم إن شاء الله كلكم بصحة وعافية يارب 

تدوينة اليوم بتكلم عن تجربة الشراء من موقع كيم للملابس الداخلية  Skims 

السنة اللي فاتت اعلنت كيم كارداشيان انها بتسوي مشروع جديد خاص بالملابس الداخلية من نظرتها انها كانت تعاني حتى تلاقي الشيب وير المناسب لملابسها خاصة الفساتين المفتوحة بساق وحده .. بفديو لها ذكرت انها وصلت لدرجة تصبغ و تخيط هالقطع بالبيت حتى تناسب درجتها 🤦🏻‍♀️ .. اللي ميزها انها وفرت ملابس داخلية على حسب درجة كل بشرة حول الخمس درجات (برأي تحتاج تزيد درجات اكثر 🌚) ،
قبل ماتسميه سكيمز  SKIMS كان اسمه كيمونو KIMONO ( كيمونو بالايابانية تعني شي لإرتدائة)
طبعآ السالفة سوت ضجة عند اليابانيين بإن الاسم في إهانة للزي التقليدي لهم ، صرحت كيم بإنها ماتقصد الاساءة وغيرت الاسم الى SKIMS.

المقاسات تبدأ من xxs إلى مقاس 4xL وبعض القطع الى مقاس 5XL , الأسعار تبدأ من ١٨ دولار إلى ٩٨ دولار .

على كلام TMZ ان كيم كارداشيان حققت من هالبراند ٢ مليون دولار 🤪

-

-

هذا النوع اللي طلبتة إلى فوق الركبة بشوي 

SCULPTING SHORT ABOVE THE KNEE

 جدول المقاسات برضوا موجود بالموقع تقدرون تقيسون بالمتر وتاخذون على أساسة 

اسم الدرجة : OCHRE

رأي فيه : أخذت مقاس s/m  لأني غالباً بين هالمقاسين ،اول ماشفته ماتوقعت يدخل صراحة مبينن ضيق ممره 🤣 بس لا طلع مره تمام باللبس ويشد واللون قريب من درجة بشرتي .. من عند الخصر ثابت ولا يتحرك حبيت هالشي 👏

 ملاحظة* اذا بتغسلونه مكتوب بالموقع بماء بارد ومن غير مبيض.

سعره ٣٦ دولار حول ١٣٥.٦ ريال 

الرابط 

شحنتها على بريد أمريكي ب٨$

عندهم شحن للسعودية ب50 دولار عن طريق DHL ماجربت الصراحة
بس البلوقر ولاء@walahearts جربت شحن مباشر ووصلها بأسبوع تقريباً فاللي ودها يعني 🙊

طلبتها بتاريخ ١٩/٣/٢٠٢٠

وصلت الى بريدي بتاريخ 24/3/2020

ووصلت للبيت عن طريق ارامكس (بما اني مشتركة بشوب اند شيب) بتاريخ 2/4/2020

ودفعت ٣٧ ريال اللي هي قيمة الشحن

يعني حول الـ.14 يوم.

التكلفة الإجمالية : ٢٠٧ ريال

عاد بخاطري اجرب اشياء ثانية ان شاء الله لي طلب آخر 

اذا عندكم أي اسئلة تقدرون تسئلوني هنا او عن طريق انستقرامي @beedailyblogpost

وبس 💛